“ⵒ” ⵖ ⵜⵎⴰⵣⵉⵖⵜ

ⴰⵙⴽⴽⵉⵍ ⵏ “ⵒ” ⵓⵔ ⵉⴳⵉ ⴰⵥⵓⵕⴰⵏ ⵖ ⵜⵎⴰⵣⵉⵖⵜ, ⵖⴰ ⴰⵏⵏ ⴰ ⴼ ⵉⵖ ⴷ ⵕⴹⵍⵏ ⵉⵎⴰⵣⵉⵖⵏ ⵜⴰⴳⵓⵔⵉ ⵏⵏⴰ ⵖ ⵉⵍⵍⴰ, ⴰⵔ ⵜ ⵙⵏⴼⴰⵍⵏ ⵙ “ⴼ“.

ⵉⵎⴷⵢⴰⵜⵏ ⵙⵖ ⵜⵍⴰⵜⵉⵏⵜ:
Pullus → ⴰⴼⵓⵍⵍⵓⵙ
Pirus → ⵜⴰⴼⵉⵔⴰⵙⵜ
Pascha → ⵜⴰⴼⴰⵙⴽⴰ
Peccatum → ⴼⴰⴽⴽⵓⴹⴰ
Pala → ⵜⴰⴼⴰⵍⴰ
Puleium → ⴼⵍⴰⵢⵢⵓ
Ripa → ⴰⵔⵔⵉⴼ
Pulcher → ⴰⴼⵓⵍⴽⵉ

ⴽⵔⴰ ⵏ ⵓⵕⵟⵟⴰⵍ ⴰⵜⵔⴰⵔ:
Apuleius → ⴰⴼⵓⵍⴰⵢ
Président → ⴼⴰⵔⵣⵉⴷⴰⵏ
Pansement → ⵍⴼⴰⵚⵎⴰ
Pommade → ⴼⵓⵎⴰⴷ

ⵖ ⵓⵣⵎⵣ ⴰⴷ, ⵉⵎⴰⵣⵉⵖⵏ ⵖ ⵜⵓⴳⵜⵜ ⴰⵔ ⵙⵏⴼⴰⵍⵏ “ⵒ” ⵙ “ⴱ” ⴰⵛⴽⵓ ⵉⴳⴳⵔ ⴰⵙⵏ ⵓⵙⵓⵙⵔⵓ ⴰⵙⵔⵖⵉⵏ, ⴰⵛⴽⵓ ⵜⵓⵜⵍⴰⵢⵜ ⵜⴰⵙⵔⵖⵉⵏⵜ ⴰⵔ ⵜ ⵜⵙⵏⴼⴰⵍ ⵙ “ⴱ“.

ⵉⵎⴷⵢⴰⵜⵏ:
Anthropology → أنثروبوبوجيا
Paris → باريس
Pepsi → بيبسي
ⴰⵜⴳ…

ⵉⵖ ⵏⵔⴰ ⴰⴷ ⵏⴰⵎⵥ ⴰⵙⵓⵙⵔⵓ ⵏⵏⵖ ⴰⵙⴰⵍⴰⵏ, ⵀⴰ ⵏⵏ ⵉⵇⵇⴰⵏ ⴷ ⴰⴷ ⵏⴹⴼⵕ ⴰⵙⵓⵙⵔⵓ ⴰⵣⴰⵢⴽⵓ ⵡⴰⵅⵅⴰ ⵜ ⵓⵔ ⵏⵎⵢⴰⵔ.

ⴷⴰⴷⴷⴰⵙ ⴰⴽⴽⵯ ⵏ ⵢⴰⵏ ⵓⵎⴷⴷⴰⴽⴽⵯⵍ ⵙ ⵓⴳⴰⵎⴰ ⵏⵏⵙ ⴰⵔ ⵉⵜⵜⵉⵏⵉⵏ “ⵡⴰⵟⵚⴰⴼⴼ” ⵉ WhatsApp ⵡⴰⵅⵅⴰ ⵊⵊⵓ ⵓⵔ ⵉⵖⵔⵉ ⵜⴰⵙⵏⵉⵍⵙⵜ ⴰⴼⴰⴷ ⴰⴷ ⵉⵙⵙⵏ ⴰⵎⵣⴰⵔⴰⵢ ⴳⵔ ⵉⵎⵙⵍⵉⵜⵏ ⴰⴷ.

ⵉⵖ ⵓⴽⴰⵏ ⵏⵛⵓⴽⴽⴰ ⴰⴼⴳⴰⵏ ⴰⵎⴽⵙⵓⵍ ⵏⵖ ⴷ ⵜⴰⵖⴰⵡⵙⴰ ⵜⴰⵖⵍⴰⴷⴰⵏⵜ, ⵎⴰ ⵔⴰⴷ ⵙⵓⵍ ⵏⴼⵍ ⵉ ⵜⵎⴰⴳⵉⵜ ⵏⵏⵖ?

ⵢⴰⵏ ⵓⵎⴷⵢⴰ ⵉⵛⵡⴰⵏ ⵥⵕⵉⵖⵜ ⵉⵍⵍⴰ ⴰⴷ:
Europe → ⵜⵓⵕⵓⴼⵜ