Mṛḥba bik f Tamɣrabit, blug kaml b ddarija u ɛla ddarija.
Ɣaliban mɛa ddxla ɣadi tgul mɛa ṛaṣk “ac had ccinwiya hadi?”. Had liḥsas bḥal dyal fac katcuf lluɣa lkurdiya ulla lfarisiya mktuba b lḥṛuf dyal lɛṛbiya, lḥṛuf katɛṛfhum walakin dmaɣk makayqdrc ijmɛ lklmat. Matxafc! Hadi ɣir Ddarija dyalna, walakin labsa kswa jdida u mtuwwla: llatiniya dyal l IRCAM.
Fac mqqssṛ mɛana ssistim lli xddamin bih lmɣarba daba?
Ssistim lli xddamin bih lmɣarba daba kaycbh l ci mtiḥan dyal lmaṭ marajɛtic lih, 7 blast /ḥ/, 3 blast /ɛ/, u 9 blast /q/… uzuz. Cuf, ana kanbɣi lmaṭ, walakin lluɣa ma xashac kalkilaṭris, had lar9am kanu ɣa dippanaj f lwqt dyal MSN. Ɛad zid lmuckil dyal kulla waḥd u kifac kayktb lklma, bḥal: chouf, shouf, xouf… ssiba safi!
U ɛlax ma nktbuc b lḥṛuf dyal lɛṛbiya u nhnniw ṛaṣna?
Lḥṛuf dyal lɛṛbiya zwinin, walakin kayjini bḥal ila ɣadi tlbs sbbaṭ sɣr mn rjlik b 4 dyal nmari. Awwal muckil mɛa lḥṛuf dyal lɛṛbiya huwwa ccakl, lɛarbiya katɛwwl ɛla ccakl, u ḥna f tilifonat ckun ɛndu lwqt ickkl? Lklma bla tckal katbqa ɣir “snsul” dyal lḥṛuf xaṣṣk tbqa tqmmṛ ɛla nnuṭq dyalha, ɛad zid lṣwat lli naqsin, Ddarija fiha ḥṛuf mufaxxama, bḥal ẓ u ṛ (/z/ u /r/ ghlad) lli makayninc f lɛṛbiya.
Waḥd lmuckil axuṛ, lli ṭṛa mɛa drari dyal Wikipedia Darija, huwwa dyal kifac anktbu b had lḥṛuf dyal lɛṛbiya, wac nktbu itimulujiyan, zɛma nktbu lklma kimma f laṣl dyalha (xususan lklmat li laṣl dyalha mn lɛṛbiya lfusḥa), bḥal بطولة ,المغرب, ulla nktbuha ktaba ṣawtiya بوطولة ,لمغريب.
Waxxa lktaba litimulijiya ɛndha lɛyub dyalha, bḥal dak lmital mchur dyal “شفنا مدافع الجيش ف المغرب” lli iqdr ittqṛa u ittfhm b 4 ṭṭuṛuq mxtalfin u kullhum dalaliyan sḥaḥ (cuf ṭṭablu 1).
Lktaba ssawtiya tahiya tqdr txlli lklmat ikunu twal u masahlinc ittqṛaw, xususan lnass lli mwlfin ɛla lɛṛbiya lfusḥa; u zid katji lci nas bḥala kaddḥk ulla kaygulu ɛliha Ddarija dyal lɛṛubiya (waxxa hta Ddarija dyal lɛṛubiya mzyana).
| Ddarija | Transcription | Ttrjama b lungli |
| شفنا مدافع الجيش ف الموغرب | šfnā mdāfʿ l-ǧīš f l-mūġreb | We saw the army cannons during sunset. |
| شفنا مودافيع الجيش ف الموغرب | šfnā mūdāfīʿ l-ǧīš f l-mūġreb | We saw the Army defender during sunset. |
| شفنا مودافيع الجيش ف المغريب | šfnā mūdāfīʿ l-ǧīš f l-meġrīb | We saw the Army defender in Morocco. |
| شفنا مدافع الجيش ف المغريب | šfnā mdāfʿ l-ǧīš f l-meġrīb | We saw the army cannons in Morocco. |